【香港】【李八方online】會展耗資3千萬 打造處處有Wi-Fi場館
人人一機在手嘅年代,個個希望處處有Wi-Fi。灣仔會展宣布,委託香港寬頻為會展提升Wi-Fi網路系統工程,預計明年第三季完成工程。工程有乜咁巴閉?原來係會重新裝設先進Wi-Fi網絡系統,屆時會展會有多達660個Wi-Fi網絡接入點,並可同時支援逾2萬部流動裝置,提供最高每秒達10Gb嘅傳輸速度,將來仲可以擴充。

整個工程耗資3千萬,網絡系統係採用業界視為最高標準嘅802.11acwave2,提升後可以滿足大量訪客同時使用Wi-Fi上網,據知Wi-Fi網絡系統覆蓋逾134萬平方呎,包括六個展覽廳、兩個會議廳、52個會議室、兩個多用途廳、兩個演講廳、大堂同埋所有公眾地方、7間餐廳等,屆時去到會展唔怕冇得上網。